Author Topic: Urdu Shaa,iree-4  (Read 573 times)

0 Members and 1 Guest are viewing this topic.

Sarwar A. Raz

  • Moderator
  • *****
  • Posts: 26
Urdu Shaa,iree-4
« on: August 07, 2013, 05:17:57 AM »
Urdu Shaa,ire - 4

yeh is silsile (series) kaa chauthaa (4th) lekh hai. is lekh ke saath ham shaa,ire k ek mushkil hisse meN daKhil ho rahe haiN. yanee ab ham shaa,iree ke un nikaat (nuktah kaa plural, important points) par baat kareN ge jin kee bunyaad par Urdu shaa,iree khaRee huyee hai. yahaaN apne ek mushkil kaa aap se zikr karnaa zarooree samajhtaa hooN. meraa yeh lekh aur is ke bad aane waale sab lekh Urdu kaa ilm-e-arooz (chhand vigyaan) ko Hindi waaloN ke liye kaar-aamad (useful and usable) banaane kee ek koshish haiN.

yeh kaam bohat mushkil hai. agar aisaa nah hotaa to koyee nah koyee ab tak yah kaam kar chukaa hotaa. waise chhoTee-moTee ek aadh koshish nazar aa jaatee hai lekin koyee aisee koshish kaheeN naheeN nazar aayee jisne yeh kaam shuroo se aakhir tak pooraa aur systematically kiyaa ho aur woh bhee aisaa keh Hindi waale thoRee see mehnat se us ko Hindi shaa,ire meN istamaal kar sakeN.

zaahir hai keh itnaa baRaa kaam ek aadamee (aur woh bhee mujh jaisaa be-ilm) naheeN kar saktaa. mujh ko qadam qadam par aap kee madad kee zaroorat ho gee. yeh madad kayee tarah kee ho saktee hai:

(a)   jo baat maiN Theek se nah samjhaa sakooN woh aap mujh ko fauran bataayeN aur bataate waqt woh reasons bhee likheN jin kee wajh se aap samajh naheeN paa rahe haiN.
(b)   nayee baateN aur points jo meree nazar se ojhal ho jaayeN aap mujh ko bataayeN taa keh maiN un par mehnat kar sakooN.
(c)   Hindi shaa,iree aur meree batoN meN jahaaN aap clash dekheN woh fauran mujh ko bataayeN.
(d)   Kuchh baateN aap Hindi poets aur gyaaniyoN se poochh sakte haiN. un kee baateN aur sujhaa,o likhiye.

to aa,iye aba age baRhte haiN.

*************
(A)

ab ham behr, wazn, taqtee par baat kareN ge. yeh aur is ke ba’d aane waale lekh uchhaaran (pronunciation, talaffuz) kaa kaa jo system istamaal kareN ge woh neeche diyaa jaa rahaa hai. is  ko samajhnaa aur yaad rakhnaa zarooree hai. is ke baGhair pooree baat samajhnaa mushkil ho jaaye gaa:

AawaazoN kee Key:

N : Nasal noon jaise “kyoN”
n  : noon kee aawaaz jaise “namak”

R :  Ra kee aawaaz jaise “khaRaa, baRaa”
r  :  rey kee aawaaz jaise “aaree, pyaar”

kh : kha kee aawaaz jaise “khaanaa, dukh”
Kh : Urdu Kha kee aawaaz jaise “Khatm, aaKhir, Khoob”

q : Urdu qaaf kee aawaaz jaise “aaqaa, qawwalee, qubool”

z : Urdu za kee aawaaz jaise “aawaaz, zabardast, raazee”

a : chhoTaa a  kee aawaaz jaise “ab, bhar, sab”
aa : baRe aa kee aawaaz jaise “yahaaN, jaa, nawaab, Kharaab”

gh : Hindi/Urdu gha kee aawaaz jaise “ghar, ghaRaa”
Gh : Urdu Gh kee aawaaz jaise “ Ghaa,ib, baGhair, naaGhaa”

t : Hindi/Urdu t kee aawaaz jaise “raat, nritya, naataa”
T : Hindi/Urdu Ta kee aawaaz jaise “aaTaa, ghaaT, TaTToo”

d : Hindi?urdu da kee aawaaz jaise “daadaa, nadee, aadamee”
D : Hindi/Urdu Da kee aawaaz jaise “Doob, DanDaa, anDaa”

u : Hindi/Urdu kee chhoTee oo kee aawaaz jaise “muR,shukr, dukh, guR”

ph : Hindi/Urdu ke ph kee aawaaz jaise “phir, phooNk, pheNknaa,                                                                                                                                        phalaaNg”. yeh f kee aawaaz naheeN hai. kuch log :phir: ko :fir: likhte haiN jo Ghalat hai.
f : yeh aawaaz Hindi meN naheeN hai. Urdu meN aam hai jaise “fauran, kaafoor, toofaan”

(B)

is ke ilaawah kuchh aawaazeN aur samajhne kee bohat zaroorat hai kyoN keh yeh behr aur taqtee meN istamaal hotee haiN. yeh neeche dee jaa rahee haiN. in ko samajhnaa aur yaad rakhnaa aasaan hai. yeh aawaazeN Urdu kee haiN lekin in ko jin lafzoN se adaa kiyaa gayaa hai woh Urdu ke naheeN bal keh Arabic ke “dummy” lafz haiN jin kaa koyee matlab naheeN hai lekin jin kee aawaaz hamaare kaam ke liye bohat zarooree hai:

fa = yeh aawaaz ek jhaTke se Khatm hotee hai, jaise “ab, ruk, haT, miT”.

i = chhoTee e kee aawaaz jaise “gir, nirmal, kiran” meN hai

lun = yahaaN u kee aawaaz aise ho gee jaise “chunree, gunjan, gum-sum” meN hai.

fa-i-lun : jis tarah likhaa hai usee tarah paRhiye yanee (fa+ i + lun) jaise (gu+ni+jan). chooN keh i chhoTee aawaaz hai is liye is ko(gu+nee+jan) naheeN paRhaa jaaye gaa bal keh nee ko short kar ke ni kahaa jaaye gaa.

fa kee aawaaz oopar dikhaayee gayee hai aur us kee adaa,igee bhee bataa dee gayee hai. yooN samajhiye keh fa meN jaise f par chhoTe  a kee maatraa lagee hai.

agar ab ham likheN : faa-i-lun to pehlaa TukRaa faa lambee aa kee maatraa ke saath adaa ho gaa, jab keh i chhoTee aawaaz hee de gaa, jaise din-ba-din.( yahaaN ham ne din-ba-din meN ba likhaa hai lekin bolne meN b par chhoTee a kee maatraa ho gee aur ba ko baa naheeN paRheN ge.)

faa-i-lun kee ek aur misaal dekheN :dilkashee jis ko muNh se adaa karte huwe k par chhoTee a kee maatraa lagaayee jaatee hai aur is ko dilkaashee naheeN kehte haiN.

dilkashee = dil + ka + shee

ab agar ham likheN : mafoolun = maf-oo-lun to is ko bhee jaisaa likhaa hai waise hee paRheN ge yanee  maf, oo, lun teenoN ko lambee aawaaz se bolaa aur adaa kiyaa jaaye gaa.

ab dekhiye : raajaajee = raa+jaa+jee jis kee adaa,igee bilkul maf-oo-lun kee tarah hai. farq sirf yeh hai keh maf ko raa, oo ko jaa aur lun ko jee ke baraabar rakhaa gayaa hai, yanee har lambee aawaaz ke liye lambaa afaa,eel likhaa gayaa hai. saath hee yeh bhee zaahir hai keh (for example) raa meN baRee aa kee maatraa hai jab ke maf meN chhTee a kee maatraa hai. isee tarah jaa meN baRe aa kee maatraa hai aur oo meN baRe oo kee etc. lekin yeh fact apnee jagah hai keh zabaan yaa bhaashaa yaa sentence ke lambe TukRe ko lambe afaa,eel se dikhaayaa gayaa hai. is se pataa chalaa keh is exercise meN aawaazoN kee lambaayee dekhee gayee hai, un kee exact soorat naheeN! is tarah teen lambee aawaazoN waalaa koyee shabd yaa fiqraa bhee ham mafoolun se adaa kar sakte haiN. misaaleN dekhiye:

aa bhee jaa = maf oo lun
ghar baahar = ghar baa har = maf oo lun
saaraNgee = saa raN gee = maf oo lun
jeete jee = jee te jee = maf oo lun
naNgaapan = naN gaa  pan = maf oo lun
lambaayee = lam baa yee = ma foo lun

in misaaloN se yeh maloom huwaa keh lambee aur chhoTee aawaazoN ko dummy words se symbolically dikhaayaa jaa saktaa hai. is se pehle ham 1-2 aur s-l kaa system dekh chuke haiN. agar in ko istamaal kareN to oopar kee misaal ko yooN dikhaa sakte haiN:

aa bhee jaa = 2 2 2 = l l l
ghar baahar = ghar baa har = 2 2 2 = l l l
saaraNgee = saa raN gee = 2 2 2 = l l l
jeete jee = jee te jee = 2 2 2 = l l l
naNgaapan = naN gaa pan = 2 2 2 = l l l
lambaayee = lam baa yee = 2 2 2 = l l l 

is se pehle yeh bhee kahaa jaa chukaa hai keh 1-2 aur s-l ke nizaam shaa,iree ke kaam meN hamaaree madad pooree tarah naheeN kar sakte haiN. aage chal kar aap ko is baat kaa suboot bhee mil jaaye gaa.

(C )

jo log sangeet kaa shauq rakhte haiN woh jaante haiN keh Hindustani classical sangeet ke raag aur raaganee suroN se bante haiN. hamaare sangeet vidvaanoN ne bohat pehle yeh maloom kar liyaa thaa keh insaan kee aawaaz jitnee tarah se adaa ho saktee hai who sab kee sab sirf saat suroN kee madad se adaa ho saktee haiN. yeh saat sur shudh swar kehlaate haiN aur neeche likh diye gaye haiN. in ko shudh is liye kehte haiN keh in kee adaaigee meN hameN koyee mehnat naheeN karnee paRtee hai kyoN keh yeh swar natural haiN aur hamaare gale se bilkul aasaanee se adaa ho sakte haiN:

saa, re, gaa, maa, paa, dhaa, nee

in meN se chaar sur (re, gaa, paa, dhaa) aise haiN jin kee zaraa dabee huyee (maddham) shakl zaraa see koshish se adaa ho saktee hai. inheN komal sur kehte haiN. maa kee komal shakl ko teewra maa kehte haiN. is taraH kul 12 sur bante haiN jin se insaan ke gale kee har aawaaz adaa ho saktee hai:

saa. re. gaa. maa, paa, dhaa, nee : shudh sur
re, gaa, paa, dhaa : komal sur
maa : teewra sur

inheeN 12 suroN ke muKhtalif combinations se sab classical raag bane haiN. saa, re, gaa etc alaamatoN (symbols) kee ek soorat hai jo insaanee aawaaz ke muKhtalif raNgoN kee adaa,igee meN istamaal ho saktee haiN.

1, 2 aur s, l bhee alaamaat (symbols) haiN jin se aawaazoN kee shakl (lambaa yaa chhoTaa honaa) ko zaahir kiyaa gayaa hai. agar zabaan (language) ke kuchh symbols aise banaaye jaa sakeN jo hamaaree zabaan ke har lafz ko symbolically adaa kar sakeN to phir zabaan ko TukRoN meN toR kar us ko samajhne aur samjhaane meN aasaanee ho saktee hai. Khush-qismatee se hamaare buzurgoN ne aise symbols discover kar liye the aur hamaare liye woh chhoR gaye haiN.

(D)

Urdu meN aisee alaamaat (symbols, dummy words) haiN keh Urdu kaa har lafz aur fiqraa in symbols se adaa kiyaa jaa saktaa hai. yeh alaamaat kul aaTh [8] haiN aur in ko “afaa-eel” kaa naam diyaa gayaa hai. neeche yeh 8 afaa,eel likhe jaa rahe haiN:

(1)    fa-oo-lun      : 1- 2- 2          ف + عو + لن
(2)    faa-i-lun      : 2- 1- 2          فا + ع + لن         
(3)    mu-faa-ee-lun   : 1- 2- 2- 2         م + فا + عی + لن
(4)    faa-i-laa-tun   : 2- 1- 2- 2         فا + ع + لا + تن
(5)    mu-ta-faa-i-lun   : 1- 1- 2- 1- 2      م + ت + فا+ ع + لن
(6)    mu-faa-i-la-tun   : 1- 2- 1- 1- 2      م + فا + ع + لا + تن
(7)    mus-taf-i-lun   : 2- 2- 1- 2          مس + تف + ع + لن
[8]    maf-oo-laat   : 2- 2- 2            مف + عو + لات

yeh shaa,iree ke woh “shudh sur” haiN jin ko “afaa,eel” kahaa jaataa hai aur jo behroN ke “building blocks” kaa kaam karte haiN. inheeN kee ulaT-pulaT se, yanee in ke muKhtalif combinations se Urdu kee behreN banaayee gayee haiN.  har afaa,eel ke saamne Urdu meN us kaa transliteration likh diyaa gayaa hai. aap ke liye is waqt yeh Urdu kee writing samajhne kee zaroorat naheeN hai. aage dekhaa jaaye gaa. oopar afaa,eel ke naamoN ke saamne 1-2 kee madad se har TukRe kaa wazn (weight) bhee likh diyaa gayaa hai. 1 se chhoTee aawaaz dikhaayee gayee hai aur 2 se lambee aawaaz. chhoTee aur lambee se hamaaraa kyaa matlab hai?

(1)    chhoTee aawaaz se matlab aisee aawaaz hai jis meN Sirf ek (1) harf (akchhar) kee aawaaz sunaayee de. yahaaN harf se Urdu ke harf  muraad haiN. misaal ke taur par “fa” asl meN Urdu ke “fe” par chhoTe :a: kee maatraa hai. yanee yeh ek harf  :fe: kee hee aawaaz hai, do kee naheeN! jo log Urdu bilkul naheeN jaante haiN un ke liye yeh baat samajhnee mushkil ho gee. isee liye maiN aap se kehtaa hooN keh thoRee see Urdu aap ko seekhnee chaahiye taa keh aap taqtee aur shaa,iree Theek se kar sakeN. yeh koyee mushkil kaam naheeN hai. sab kar sakte haiN jaise maiN ne aasaan aur basic Hindi seekhee hai.
(2)    lambee aawaaz se matlab aisee aawaaz hai jis meN do (2) harfoN kee aawaaz sunaayee de. jaise “taf “ asl meN do harf  :toe: aur :fe: kaa combination hai jis meN toe par chhoTe a kee maatraa hai jis se aawaaz taf ban gayee hai. Roman meN aisee maatraa letter likh kar hee dikhaayee jaa saktee hai. aap ko ab is kaam meN mehnat karnee ho gee. jo sawaal dimaaGh meN aaye be-jhijhak poochheN. shuroo shuroo meN jo shak dil se nikal jaayeN ge wohee aage kaam deN ge. maiN Vikas aur Rashmi se keh rahaa hooN keh who sawaal-jawaab ke liye ek laRee yaa child-board  banaa deN. aap is meN sawaal poochh leN aur jab tak aap kaa itmeenaan nah ho jaaye poochhte raheN.  binaa samjhe aage baRhne se koyee faa,idah naheeN ho gaa!   

aap kaheN ge keh shaa,iree ke :shudh: suroN kee baat to huyee, is ke :komal: sur kahaaN haiN? shaa,ire meN bhee :komal: suroN kee taraH soorat hotee hai. oopar jo afaa,eel likhe gaye haiN un ko muKhtalif  tareeqoN se badal kar in ko nayee soorateN dee jaatee haiN jo “zihaaf” kehlaatee haiN. abhee ham zihaaf kee baat naheeN kareN ge kyoN keh yeh kaafee complicated subject hai. jab ham log afaa,eel par qaaboo paa leN ge to aage baRheN ge. is ke liye zarooree hai keh aap mujh ko Theek Theek bataate raheN keh aap afaa,eel aur un ke istamaal par kitnaa qaaboo paa liyaa hai. agar aap aisaa naheeN kareN ge to yeh kaam Theek se naheeN ho sake gaa.

yahaaN yeh baat kehne kee zaroorat hai keh jis tarah sangeet meN kul 12 suroN se sab raag banaaye jaa sakte haiN usee tarah Urdu shaa,ire meN oopar diye gaye 8 afaa,eel aur un ke zihaafoN (in par baat bad meN ho gee) se shaa,iree kee sab behreN banaayee jaa saktee haiN! aage ham yehee kaam kareN ge.

aap se nivedan hai keh aap is lekh par mehnat kareN aur achhee tarah is ko samajh leN. aglaa lekh use waqt kaam aa sake gaa jab aap is lekh ko samajh kar is par pooraa qaaboo paa leN ge, yanee jab aap ke dil aur dimaaGh meN koyee shak yaa sawaal aisaa naheeN rahe gaa jis kaa jawaab aap ke paas nah ho.

*************




« Last Edit: August 07, 2013, 05:20:09 AM by Sarwar A. Raz »

Aarti

  • Administrator
  • *****
  • Posts: 80
  • Gender: Female
Re: Urdu Shaa,iree-4
« Reply #1 on: August 07, 2013, 05:38:45 PM »
Sarwar ji ........... bahut bahut interesting hai article aapka ... bahut kuch naya hai ........

SuroN waali baat nayee rahi mere liye ....


shukriyaa...

umeed hai sab padh ke yaha jawaab bhi denge... agar koe sirf padh ke ye soch le use samjh aa gaya hai.. to mere khayal se ye uski hi bhool hogi ...

regards...
« Last Edit: August 07, 2013, 05:53:13 PM by Aarti »

Rashmi

  • Global Moderator
  • ***
  • Posts: 1893
  • Gender: Female
  • Hum se khafa zamaana to Hum bhi jamaane se khafa
Re: Urdu Shaa,iree-4
« Reply #2 on: August 07, 2013, 06:09:42 PM »
aadrniya sarwar ji -------sadar naman ji---ummid karti hooN aapki tabiut ab darusat hogi ji
  bahut hi achha laga aapka 4th lekh dekh kar bahut kuchh naya jaanane ko mila aap ke samjhaane ka tarika sarahniya hai --or lagta hai ke jitne baar padu kuchh or naya samajh aayega ---abhi jyada kuchh nahi bolungi pahle do teen baar paD ke phir aapki sharan meiN aate haiN ji baapis tab  tak ke liye izaazat dijiye duaaon ke saath
Rashmi Sharma

gooDe akkhar ,fatti sukki
adiyo meri gaachi mukki
sukke hanjhu akkhaN waale
haaDa! akkhar mooloN kaale

AnjAAn!!!

  • Newbie
  • *
  • Posts: 43
  • Gender: Male
    • My Facebook Profile
Re: Urdu Shaa,iree-4
« Reply #3 on: August 08, 2013, 03:00:12 AM »
Sarwar sahab, sabse pahle to shaairi ke chauthe lekh par aapko behad mubaarak baad dena chahunga. Ek bahut hi achcha lekh padhne ko mila pichhle lekhoN ki tarah. Ek sawaal utha zahn meN

Jab baat alaamaat ki hui to aathaviN ya 8th alaamat y'ani ki mafoolaat ka wazn kis tarah 222 ke wazn ke baraabar hai. Mera matalab hai ki mujhe laat par ye wazn alag hota dikha. Kripya is par roshni daaleN.

Shukriya
MaiN tumheN paanch baje call karuN
Kah ke mujh ko ghadi se baandh diya

Sarwar A. Raz

  • Moderator
  • *****
  • Posts: 26
Re: Urdu Shaa,iree-4
« Reply #4 on: August 08, 2013, 03:45:31 AM »
Sarwar sahab, sabse pahle to shaairi ke chauthe lekh par aapko behad mubaarak baad dena chahunga. Ek bahut hi achcha lekh padhne ko mila pichhle lekhoN ki tarah. Ek sawaal utha zahn meN

Jab baat alaamaat ki hui to aathaviN ya 8th alaamat y'ani ki mafoolaat ka wazn kis tarah 222 ke wazn ke baraabar hai. Mera matalab hai ki mujhe laat par ye wazn alag hota dikha. Kripya is par roshni daaleN.

Shukriya
janaab AnjAAn saaheb: aadaab aur Namaste!

aap ne mazmoon pasand kiyaa to mere izzat baRhee. shukriyah. aap kaa sawaal munaasib hai aur fitree (natural) taur par zehn meN uThtaa hai. yeh abhee uljhan kaa sabab (kaaran) hai lekin jab aap taqtee ke usool dekheN ge to baat saaf ho jaaye gee. isee liye main ne is se pehle kahaa thaa keh taqtee kee practice karne waaloN ko is se bohat ziyaadah faa,idah naheeN ho gaa. kuchh din sabr keejiye aur apnaa sawaal zehn meN rakhiye. shukriyah

Sarwar A. Raz

hamdam

  • Sr. Member
  • ****
  • Posts: 271
  • Gender: Male
Re: Urdu Shaa,iree-4
« Reply #5 on: August 11, 2013, 02:20:44 PM »
Shriman Sarwar sahib ,
 Namaskar aur adaab .....apka yeh lekh para , thora samajh me aya , thora samajh mein nahin bhi aya.
Per basic clarification ho rahi hai aur mujhe lagta hai ik main abhi bilkul kachcha hu is subject mein  to thora wakt lagega.

Behrhaal takti mein awazon ki clarifiation aur apka music ke saat suron ka example de kar samjhana  bahut realistic tha mujh jaise naye logon ke liye .. Baki koshish karta hun aur jo bhi difficulties ayengi vo apke saamne rakhunga..

Baaki ek sawaal ye hai ki basic behar 8 tarah hi hain  jinko follow karna parega bigining mein..

yahan yeh baat kehne kee zaroorat hai keh jis tarah sangeet meN kul 12 suroN se sab raag banaaye jaa sakte haiN usee tarah Urdu shaa,ire meN oopar diye gaye 8 afaa,eel aur un ke zihaafoN (in par baat bad meN ho gee) se shaa,iree kee sab behreN banaayee jaa saktee haiN! aage ham yehee kaam kareN ge

Sanjay  sehgal
« Last Edit: August 11, 2013, 02:22:20 PM by hamdam »

Sarwar A. Raz

  • Moderator
  • *****
  • Posts: 26
Re: Urdu Shaa,iree-4
« Reply #6 on: August 11, 2013, 03:58:47 PM »
Shriman Sarwar sahib ,
 Namaskar aur adaab .....apka yeh lekh para , thora samajh me aya , thora samajh mein nahin bhi aya.
Per basic clarification ho rahi hai aur mujhe lagta hai ik main abhi bilkul kachcha hu is subject mein  to thora wakt lagega.

Behrhaal takti mein awazon ki clarifiation aur apka music ke saat suron ka example de kar samjhana  bahut realistic tha mujh jaise naye logon ke liye .. Baki koshish karta hun aur jo bhi difficulties ayengi vo apke saamne rakhunga..

Baaki ek sawaal ye hai ki basic behar 8 tarah hi hain  jinko follow karna parega bigining mein..

yahan yeh baat kehne kee zaroorat hai keh jis tarah sangeet meN kul 12 suroN se sab raag banaaye jaa sakte haiN usee tarah Urdu shaa,ire meN oopar diye gaye 8 afaa,eel aur un ke zihaafoN (in par baat bad meN ho gee) se shaa,iree kee sab behreN banaayee jaa saktee haiN! aage ham yehee kaam kareN ge

Sanjay  sehgal
Sanjay jee: aadaab aur namaskaar!

Khat kaa shukriyah. jee haaN ek to ilm-e-arooz aap sab ke liye nayaa hai, phir yeh Urdu kaa ilm hai jo sab ko aasaanee se samajh meN naheeN aaye gee (Sirf isee liye maiN kehtaa hooN keh thoRee see Urdu seekh leN), teesre yeh keh is kaam meN waqt zaroor lage gaa. jo log Urdu jaante haiN un ko bhee waqt lagtaa hai. aap ko yeh jaan kar achaNbhaa ho gaa keh 99% shaa,ir arooz naheeN jaante aur sirf aTkal se sher kehte haiN! maiN abhee intizaar karooN gaa. is ke ba'd hee lekh-5 pesh karooN gaa.

aap ne likhaa hai keh behrN sirf 8 tarah kee haiN. so yeh durust naheeN hai. afaa,eel sirf 8 haiN. in kee badlee huyee shakl (zihaaf) baRee ta,daad meN haiN. waise Urdu meN ziyaadah tar jo shaa,iree hotee hai woh kul 19 behroN meN hotee hai.

Sarwar A. Raz

Rajneesh

  • Full Member
  • ***
  • Posts: 107
Re: Urdu Shaa,iree-4
« Reply #7 on: September 01, 2013, 12:10:43 PM »
sarwar A. raz sahab .. pahle shukriya ki aap itne tafseel se sab samjhaa rahe haiN, aur muaafi bhi ke maiN thoRi der se aa paaya huN....
is lekh se kaafi baateiN saaf huee haiN bas ek jagah thoRa confusion hua...
(4)    faa-i-laa-tun   : 2- 1- 2- 2         فا + ع + لا + تن
(6)    mu-faa-i-la-tun   : 1- 2- 1- 1- 2      م + فا + ع + لا + تن
4th me laa ko lambee aawaaz aur 6th me chhoti aawaaz ke saath liya gaya hai isse thoRa confused hun.. kripyaa thoRa aur clear karein...
shukriya .. :)

Sarwar A. Raz

  • Moderator
  • *****
  • Posts: 26
Re: Urdu Shaa,iree-4
« Reply #8 on: September 05, 2013, 04:27:00 PM »
sarwar A. raz sahab .. pahle shukriya ki aap itne tafseel se sab samjhaa rahe haiN, aur muaafi bhi ke maiN thoRi der se aa paaya huN....
is lekh se kaafi baateiN saaf huee haiN bas ek jagah thoRa confusion hua...
(4)    faa-i-laa-tun   : 2- 1- 2- 2         فا + ع + لا + تن
(6)    mu-faa-i-la-tun   : 1- 2- 1- 1- 2      م + فا + ع + لا + تن
4th me laa ko lambee aawaaz aur 6th me chhoti aawaaz ke saath liya gaya hai isse thoRa confused hun.. kripyaa thoRa aur clear karein...
shukriya .. :)
Rajneesh jee: Namaste!

mujh se typo ho gayee thee. mufaa,ilatun meN la ke oopar chhoTee a kee maatraa hai. main Urdu meN Ghalatee se ل  ke bajaaye لا likh gayaa hooN. aap ne dekhaa to aap kee mehrbaanee.

Sarwar A. Raz